పయనించే సూర్యుడు న్యూస్ | ఏప్రిల్ 1 తెలంగాణ స్టేట్ ఇంచార్జ్ శ్రీనివాస్ రెడ్డి

పంగుని నెలలో ఉత్తిరం నక్షత్రం సందర్భంగా జరుపుకునే అయ్యప్ప స్వామి జయంతి వేడుకలు తమిళనాడు, కేరళ రాష్ట్రాల్లో భక్తిశ్రద్ధలతో వైభవంగా నిర్వహించబడుతున్నాయి. శబరిమలలో బ్రహ్మోత్సవాల ముగింపు దినంగా భావించే ఈ పర్వదినం సందర్భంగా ప్రత్యేక పూజలు, మహోత్సవాలు ఘనంగా జరుగుతున్నాయి.ఈ సందర్భంగా కూకట్‌పల్లి అయ్యప్ప స్వామి ఆలయంలో కూడా జయంతి వేడుకలు ఆధ్యాత్మిక వాతావరణంలో భక్తుల సందడితో నిర్వహించారు. ఆలయ పరిసరాలు భక్తజనాలతో కిక్కిరిసి, స్వామివారి నామస్మరణతో మార్మోగాయి.ఈ కార్యక్రమానికి ముఖ్య అతిథిగా హాజరైన బీజేపీ సీనియర్ నాయకులు, అయ్యప్ప స్వామి దేవస్థానం చైర్మన్ వడ్డేపల్లి రాజేశ్వరరావు భక్తిశ్రద్ధలతో ప్రత్యేక పూజల్లో పాల్గొన్నారు. అర్చక స్వాముల పర్యవేక్షణలో నిర్వహించిన అభిషేకం, అర్చన, హారతుల్లో పాల్గొని స్వామివారి ఆశీస్సులు పొందారు.ఈ సందర్భంగా ఆయన మాట్లాడుతూ, “అయ్యప్ప స్వామి జయంతి అనేది నియమం, నిష్ఠ, ధర్మానికి ప్రతీక. పంగుని ఉత్తిరం పర్వదినం ప్రతి భక్తునిలో దైవత్వాన్ని మేల్కొలిపే పవిత్ర సమయం. స్వామివారి కృపాకటాక్షాలతో సమాజంలో శాంతి, సౌభ్రాతృత్వం, అభివృద్ధి నెలకొనాలని మనస్ఫూర్తిగా కోరుకుంటున్నాను” అని పేర్కొన్నారు.మొత్తంగా ఆలయంలో నిర్వహించిన ఈ జయంతి వేడుకలు భక్తుల ఆధ్యాత్మిక ఉత్సాహాన్ని ప్రతిబింబించాయి.