జమ్మికుంటలో కోర్టుల కోసం బలమైన డిమాండ్ – హైకోర్టుకు మెమోరాండం సమర్పించిన న్యాయవాదులు

పయనించే సూర్యుడు/ సెప్టెంబర్ 14/ దిడ్డి రాము/ జమ్మికుంట రూరల్)

జమ్మికుంట పట్టణంలో కోర్టుల స్థాపన కోసం న్యాయవాదులు ఒక గొప్ప కదలిక ప్రారంభించారు. ప్రజలకు సమీపంలోనే న్యాయం అందించాలనే ఉద్దేశ్యంతో, హుజురాబాద్‌లో ఉన్న సెకండ్ అడిషనల్ కోర్టును జమ్మికుంటలో స్థాపించాలంటూ హైకోర్టు న్యాయమూర్తి, కరీంనగర్ జిల్లా పోర్ట్‌ఫోలియో ఇన్‌చార్జి జడ్జి ఎన్. తుకారం జి కి మెమోరాండం సమర్పించారు. హైదరాబాద్‌లోని హైకోర్టు చాంబర్లో ఈ సమావేశం జరిగింది. జమ్మికుంట పరిధిలో కోర్టు స్థాపన అత్యవసరమని న్యాయవాదులు వివరించి, స్థానిక ప్రజలకు ఎదురవుతున్న ఇబ్బందులను జడ్జి దృష్టికి తీసుకెళ్లారు. జమ్మికుంట, ఇల్లందకుంట, వీణవంక మండలాల పరిధిలో ప్రస్తుతం 5000 పైగా కేసులు పెండింగ్‌లో ఉన్నాయని న్యాయవాదులు స్పష్టం చేశారు. చిన్నచిన్న సివిల్, క్రిమినల్ కేసుల పరిష్కారం కోసం కూడా ప్రజలు హుజురాబాద్ వరకు వెళ్లాల్సి వస్తుందని, దీనివల్ల సమయం, ధనం వృథా అవుతోందని తెలిపారు. జమ్మికుంటలో కోర్టు ఏర్పాటు అత్యవసరం. ఇది ప్రజల దీర్ఘకాల స్వప్నం. సమీపంలోనే న్యాయం లభిస్తే పేద ప్రజలకు భారీగా ఉపశమనం కలుగుతుంది.” – స్థానిక న్యాయవాదులు, ప్రజలు, రాజకీయ నాయకులు, మేధావులు, సామాజిక వర్గాలందరూ జమ్మికుంటలో కోర్టులు స్థాపించాలని కోరుకుంటున్నారని న్యాయవాదులు చెప్పారు. “హైకోర్టు సానుకూల నిర్ణయం తీసుకుంటే, జమ్మికుంట పట్టణం న్యాయపరంగా ఒక కేంద్రంగా అవతరిస్తుంది” అని వారు విశ్వాసం వ్యక్తం చేశారు. జమ్మికుంట పట్టణం జనాభా, వాణిజ్య పరంగా వేగంగా అభివృద్ధి చెందుతోంది. అయినప్పటికీ న్యాయ పరంగా ఇక్కడ మౌలిక వసతులు లేవు. పరిసర మండలాల ప్రజలు హుజురాబాద్ మీదే ఆధారపడుతున్నారు. గత కొంతకాలంగా కోర్టుల కోసం డిమాండ్ పెరుగుతూనే ఉంది. ఇప్పుడు న్యాయవాదుల కదలికతో ఈ డిమాండ్ మరింత బలంగా మారింది.ఈ కార్యక్రమంలో వంగల పవన్ కుమార్, ఏబూసి లింగారెడ్డి, పొట్లపల్లి శ్రీధర్ బాబు, నక్క సత్యనారాయణ, మొలుగూరి సదయ్య, బార్ అసోసియేషన్ హుజురాబాద్ వైస్ ప్రెసిడెంట్ నూతల శ్రీనివాస్, రావికంటి మధుబాబు, గుండ వరప్రసాద్, గూడెపు వంశీకృష్ణ, బార్ అసోసియేషన్ జాయింట్ సెక్రటరీ పిట్టల రాజేష్, బత్తుల రాజేష్, అబ్బరవేణి రాజ్ కుమార్ పాల్గొన్నారు. అలాగే హైకోర్టు న్యాయవాదులు కట్టంగూరి బుచ్చిబాబు, పొన్నం అశోక్ గౌడ్, దయానందరావు, డీ. ఎల్. పండు తదితరులు ఈ కదలికలో భాగమయ్యారు.
End…