పయనించే సూర్యుడు న్యూస్ :యూట్యూబ్ ఇంటర్వ్యూలో తాను చేసిన హత్యల గురించి వివరించడం.. ఆ మాజీ మావోయిస్టు ప్రాణాలకే ముప్పు తెచ్చింది. ఆ ఇంటర్వ్యూ చూసిన ఓ వ్యక్తి, తన తండ్రిని చంపిన మావోయిస్టుపై పగ పెంచుకున్నాడు. యూట్యూబ్ ఇంటర్వ్యూ పేరుతో అతన్ని పిలిపించి.. మభ్యపెట్టి, మద్యం తాగించి, బండరాయితో కొట్టి దారుణంగా హత్య చేశాడు. ఈ ఘటన రాజన్న సిరిసిల్ల జిల్లాలో కలకలం రేపింది. నిందితుడిని నిజామాబాద్ జిల్లా వాసిగా గుర్తించారు.ఓ యూట్యూబ్ ఛానల్‌కి ఇచ్చిన ఇంటర్వ్యూ.. మాజీ మావోయిస్టు ప్రాణం తీసింది. ఇంటర్వ్యూలో భాగంగా సదరు మావోయిస్టు.. తాను గతంలో చేసిన హత్యల గురించి వివరించాడు. అదే ఆయన హత్యకు కారణం అయ్యింది. ఈ ఇంటర్వ్యూ చూసిన ఓ వ్యక్తి.. తన తండ్రిని మాజీ మావోయిస్టు చంపాడని తెలుసుకున్నాడు. తండ్రిని హత్య చేసిన మావోయిస్టును చంపాలని భావించాడు. ఇందుకోసం యూట్యూబ్ ఇంటర్వ్యూ ఉందని మాజీ మావోయిస్టును రప్పించుకున్నాడు. వచ్చాక నిందితుడు.. మాజీ మావోయిస్టును హత్య చేశాడు. ఈ సంఘటన రాజన్న సిరిసిల్ల జిల్లాలో వెలుగు చూసింది. రాజన్న సిరిసిల్ల జిల్లా, గండిలచ్చపేటకు చెందిన మావోయిస్టు బల్లెప్పు నర్సయ్య అలియాస్‌ సిద్ధన్న(58) గురువారం సాయంత్రం దారుణ హత్యకు గురయ్యాడు. సంతోష్ అనే యువకుడు సిద్ధన్నను హత్య చేశాడు. యూట్యూబ్ ఇంటర్వ్యూ పేరుతో సంతోష్ సిద్ధన్నను వేములవాడ శివారులోని అగ్రహారం గుట్టల్లోకి తీసుకెళ్లి ఆ తర్వాత దారుణంగా హత్య చేసినట్లు పోలీసులు అనుమానిస్తున్నారు. సంతోష్‌ది జగిత్యాల జిల్లాగా గుర్తించారు. మరి సంతోష్ ఎందుకు సిద్ధన్నను హత్య చేశాడంటే.. మృతుడు మావోయిస్టుగా ఉన్నప్పుడు.. నిందుతుడైన సంతోష్ తండ్రిని హత్య చేశాడు. అందుకు ప్రతీకారంగా నిందితుడు సిద్ధన్నను హత్య చేశాడని పోలీసులు భావిస్తున్నారు.పోలీసులు తెలిపిన వివరాల ప్రకారం.. చనిపోయిన సిద్ధన్న అలియాస్ నర్సయ్య.. గతంలో నక్సల్స్ ఉద్యమంలో పని చేశారు. 1997 ప్రాంతంలో పీపుల్స్‌వార్‌ పార్టీ(ఇప్పటి మావోయిస్టు)లో సుమారు పదేళ్ల పాటు పని చేసి.. ఆ తర్వాత బయటకు వచ్చారు. ఇదిలా ఉంటే.. కొన్ని రోజుల క్రితం సిద్ధన్న ఓ యూట్యూబ్‌ ఛానల్‌కి ఇంటర్వ్యూ ఇచ్చారు. ఈ సందర్భంగా జగిత్యాల జిల్లాకు చెందిన ఒక వ్యక్తిని పార్టీ నిర్ణయం మేరకు తాను హత్య చేసినట్లు వెల్లడించారు.ఈ ఇంటర్వూ చూసిన సదరు హత్యకు గురైన వ్యక్తి కుమారుడు అయిన సంతోష్ సిద్ధన్నపై కక్ష పెంచుకున్నాడు. తండ్రి చావుకు ప్రతికారంగా సిద్ధన్నను చంపాలని భావించాడు. దీనిలో భాగంగా సంతోష్ గత కొంత కాలంగా.. సిద్ధన్నతో స్నేహం చేసినట్లు తెలిసింది. ఈక్రమంలోనే సంతోష్.. యూట్యూబ్ ఇంటర్వ్యూ పేరుతో సిద్ధన్నను వేములవాడ శివారులోని అగ్రహారం గుట్టల్లోకి తీసుకెళ్లాడు. ఆ తర్వాత అతడి చేత మద్యం తాగించి.. మత్తులో ఉండగా బండరాయితో మోది హత్య చేశాడు. మృతుడు సిద్ధన్నకు ఇద్దరు భార్యలు.. పోచవ్వ, ఎల్లవ్వ ఉన్నారు. ప్రస్తుతం సిద్ధన్న రాజకీయాల్లో ఉన్నాడని తెలుస్తోంది. 2004లో పోలీసుల ఎదుట లొంగిపోయిన సిద్ధన్న.. నాటి నుంచి తన సొంతూరు గండిలచ్చపేటలో నివాసం ఉంటున్నారు. సిద్ధన్న హత్యపై కేసు నమోదు చేసిన పోలీసులు దర్యాప్తు చేస్తున్నారు.