పయనించే సూర్యుడు న్యూస్ :సర్పంచ్ ఎన్నికల షెడ్యూల్ విడుదలైన నేపథ్యంలో గ్రామాల్లో సందడి వాతావరణం నెలకొంది. ఈ క్రమంలో రిజర్వేషన్లపై అభ్యంతరాలు వ్యక్తం చేస్తూ అత్యంత వెనుకబడిన కులాల ప్రతినిధులు హైకోర్టులో పిటిషన్ దాఖలు చేశారు. జీవో 46పై స్టే ఇవ్వాలని కోరారు. అయితే, ఎన్నికల ప్రక్రియ మొదలైనందున.. స్టే విధించడానికి హైకోర్టు నిరాకరించింది. ఈ విషయంపై కౌంటర్ దాఖలు చేయాలని ప్రభుత్వాన్ని ఆదేశించింది. కాగా, డిసెంబర్ 11, 14, 17 తేదీల్లో పోలింగ్ జరగనుంది.గ్రామ పంచాయతీ ఎన్నికల షెడ్యుల్ విడుదల కావడంతో పల్లెల్లో సందడి నెలకొంది. ఇప్పటికే మొదటి విడత నామినేషన్ల ప్రక్రియ మొదలు కావడంతో ఓటర్లను ప్రసన్నం చేసుకోవడానికి అభ్యర్థులు ప్రయత్నాలు చేస్తున్నారు. ఈ నేపథ్యంలో అత్యంత వెనుకబడిన కుల సంఘాల ప్రతినిధులు.. జీవో 46పై స్టే ఇవ్వాలని న్యాయస్థానంలో పిటిషన్ దాఖలు చేశారు. అత్యంత వెనుకబడిన కులాలకు రిజర్వేషన్లు కేటాయించాలని పిటిషనర్ల తరఫున న్యాయవాది గురువారం కోర్టు దృష్టికి తీసుకువచ్చారు. బీసీలలో ఏబీసీడీ వర్గాల ఆధారంగా రిజర్వేషన్లు ఇవ్వాలని కోరారు. ఈ నేపథ్యంలో పంచాయతీ ఎన్నికలపై స్టే ఇవ్వడానికి హైకోర్టు నిరాకరించింది.శుక్రవారం (నవంబర్ 28) తెలంగాణ హైకోర్టు ఈ పిటిషన్‌పై విచారణ చేపట్టింది. ఇప్పటికే ఎన్నికల ప్రక్రియ మొదలైందని తెలిపింది. ఈ దశలో స్టే విధించలేమని తేల్చి చెప్పింది. గ్రామ పంచాయతీ ఎన్నికలకు నోటిఫికేషన్‌ విడుదలయ్యాక ఎందుకు సవాల్‌ చేస్తున్నారని పిటిషనర్లను ప్రశ్నించింది హైకోర్టు. ఈ విషయంపై కౌంటర్‌ దాఖలు చేయాలని ప్రభుత్వానికి ఆదేశాలు జారీ చేసింది. ఈ విషయంపై తదుపరి విచారణను 8 వారాలకు వాయిదా వేసింది. హైకోర్టు స్టే నిరాకరించడంతో ఎన్నికల ప్రక్రియకు సజావుగా సాగేందుకు అవకాశం ఏర్పడింది. ఎన్నికల సంఘం షెడ్యుల్‌ ప్రకారం.. డిసెంబర్ 11న మొదటి విడత, డిసెంబర్14 రెండో విడత, డిసెంబర్ 17న మూడో విడత పోలింగ్ జరగనుంది.కాగా, గ్రామ పంచాయతీ ఎన్నికలపై అభ్యంతరాలు వ్యక్తమవుతున్న నేపథ్యంలో తెలంగాణ ప్రభుత్వం కీలక నిర్ణయం తీసుకుంది. పంచాయతీరాజ్ గ్రామీణాభివృద్ధి శాఖ కమిషనరేట్‍లో ప్రత్యేక లీగల్ సెల్ ఏర్పాటు చేసింది. ఈ లీగల్ సెల్‌లో సూపరింటెండెంట్ స్థాయి అధికారులను నియమించింది. ఈ మేరకు పంచాయతీరాజ్ శాఖ డైరెక్టర్ గురువారం (నవంబర్ 27) ఉత్తర్వులు ఇచ్చారు. అనుకున్న సమయంలోపు ఎన్నికలు సజావుగా పూర్తిచేసే విధంగా ఈ లీగల్ సెల్ పనిచేయాలని ప్రభుత్వం ఆదేశించింది. అందుకోసం లీగల్ సెల్.. జిల్లాలతో సమన్వయం చేసుకోవాలని సూచించింది.మహబూబాబాద్ జిల్లా కేసముద్రం మండలం మహబూబ్‌‌పట్నం సర్పంచ్ ఎన్నికలపై హైకోర్టు స్టే విధించింది. ఆరుగురు ఓటర్లు ఉన్న ఎస్టీలకు ఒక సర్పంచ్, మూడు వార్డు స్థానాలు ఎలా రిజర్వ్ చేశారంటూ ప్రభుత్వాన్ని హైకోర్టు ప్రశ్నించింది. కాగా, ఈ రిజర్వేషన్లు మార్చాలని గ్రామానికి చెందిన యాకూబ్‌, శ్రీకాంతాచారి, లింగయ్య, విజయ్‌, వెంకటమల్లు, పోలు నాగయ్య అనే వ్యక్తులు బుధవారం హైకోర్టులో పిటిషన్ దాఖలు చేశారు. దీన్ని విచారించిన కోర్టు.. స్టే విధించింది.