పయనించే సూర్యుడు న్యూస్ సెప్టెంబర్ 2 తెలంగాణ స్టేట్ ఇంచార్జ్ శ్రీనివాస్ రెడ్డి హైదరాబాద్ నగరంలో నకిలీ కరెన్సీ నోట్లను తయారు చేసి చలామణి చేస్తున్న ముఠా కార్యకలాపాలకు పోలీసులు అడ్డుకట్ట వేశారు. విశ్వసనీయ సమాచారం మేరకు షంషాబాద్‌ ప్రాంత ప్రత్యేక పోలీసు బృందం, బాలాపూర్‌ పోలీసులు సంయుక్తంగా చేపట్టిన చర్యల్లో ముగ్గురు నిందితులను అదుపులోకి తీసుకున్నారు. వారి వద్ద నుంచి మొత్తం రూ.2,91,100 విలువైన నకిలీ కరెన్సీ నోట్లు, నకిలీ నోట్ల తయారీకి ఉపయోగించిన పరికరాలు, ఇతర సామగ్రిని స్వాధీనం చేసుకున్నారు.పోలీసుల వివరాల ప్రకారం.. నల్గొండ జిల్లా వడ్డిపట్లకు చెందిన చింతల్‌ తండా నివాసులు రామావత్ రాము అలియాస్ మహమ్మద్‌ (36), రామావత్ మోతీలాల్‌ (35), రామావత్ గాంధీ (19) నకిలీ కరెన్సీ తయారీ, చలామణిలో కీలకంగా వ్యవహరించినట్లు గుర్తించారు. వీరిలో రాము ఆహార సరఫరా వాహనదారుడిగా, మోతీలాల్‌ ద్విచక్ర వాహన ప్రయాణ సేవల వాహనదారుడిగా, గాంధీ ఆటో వాహనదారుడిగా పనిచేస్తున్నట్లు పోలీసులు తెలిపారు. మరో వ్యక్తి సుధీర్ జాన్ చేలా అలియాస్ వంశీ పరారీలో ఉన్నట్లు వెల్లడించారు.
సామాజిక మాధ్యమాల్లో వీడియోలు చూసి..నిందితులు సామాజిక మాధ్యమాల్లో నకిలీ కరెన్సీ తయారీకి సంబంధించిన వీడియోలను చూసి ఈ అక్రమ కార్యకలాపాలకు పాల్పడినట్లు పోలీసులు తెలిపారు. నకిలీ నోట్ల తయారీ విధానం గురించి తెలుసుకున్న అనంతరం అవసరమైన ముద్రణ యంత్రం, చిత్ర పరికరం, ప్రత్యేక కాగితాలు, ఇతర సామగ్రిని సమకూర్చుకున్నట్లు విచారణలో వెల్లడైనట్లు పేర్కొన్నారు.అసలు నోట్లను పోలి ఉండేలా నకిలీ నోట్లను తయారు చేయడంతో పాటు నీటి గుర్తులను సైతం ఏర్పాటు చేసినట్లు పోలీసులు గుర్తించారు. అనంతరం రాత్రి వేళల్లో మద్యం దుకాణాలు, కూరగాయల మార్కెట్లలో తక్కువ మొత్తంలో నకిలీ నోట్లను చలామణి చేసినట్లు వెల్లడైంది. రామావత్ గాంధీ ద్వారా మార్కెట్లో మరింత విస్తృతంగా నకిలీ నోట్లను చలామణి చేసేందుకు ప్రయత్నించినట్లు పోలీసులు తెలిపారు.
భారీగా నకిలీ నోట్లు స్వాధీనంనిందితుల నుంచి రూ.500 విలువ కలిగిన 437 నకిలీ నోట్లు, రూ.100 విలువ కలిగిన 648 నకిలీ నోట్లు, రూ.200 విలువ కలిగిన 39 నకిలీ నోట్లు స్వాధీనం చేసుకున్నారు. వీటి మొత్తం విలువ రూ.2,91,100గా పోలీసులు తెలిపారు.అదేవిధంగా నకిలీ నోట్ల తయారీ కోసం ఉపయోగించిన రంగుల ముద్రణ యంత్రం, చిత్రాలను తీసే పరికరం, కాగితాలను అతికించే యంత్రం, కాగితం కోసే పరికరం, వివిధ రంగుల ద్రవాలు, తెల్ల కాగితాల కట్టలు, మహాత్మా గాంధీ చిత్రంతో ముద్రించిన కాగితాలు, నీటి గుర్తులతో కూడిన కాగితాలు, ఇనుప కొలత పరికరం, గాజు, పచ్చరంగు కవర్లు, మూడు చరవాణులు తదితర సామగ్రిని స్వాధీనం చేసుకున్నారు. నకిలీ నోట్లను అసలైన నోట్ల మాదిరిగా తయారు చేసేందుకు ఈ సామగ్రిని ఉపయోగించినట్లు పోలీసులు తెలిపారు.నకిలీ నోట్ల తయారీకి నమూనాగా ఉపయోగించిన అసలు రూ.500 నోట్లు నాలుగు, రూ.100 నోట్లు నాలుగు కూడా స్వాధీనం చేసుకున్నారు. నకిలీ నోట్ల కట్టలను సిద్ధం చేసేందుకు ఉపయోగించిన పిల్లల బ్యాంకు పేరుతో ఉన్న నకిలీ రూ.500 నోట్ల కట్టలను కూడా గుర్తించారు. నిందితుల వద్ద ఉన్న ద్విచక్ర వాహనాన్ని సైతం పోలీసులు స్వాధీనం చేసుకున్నారు.గతంలోనూ కేసుప్రధాన నిందితుడిగా పేర్కొన్న రామావత్ రాము అలియాస్ మహమ్మద్‌పై గతంలో నల్గొండ మహిళా పోలీస్‌స్టేషన్‌లో కేసు నమోదైనట్లు పోలీసులు తెలిపారు. కుటుంబ సమస్యలు, జీవనోపాధికి సరిపడా ఆదాయం లేకపోవడం వంటి కారణాలతో అక్రమ మార్గంలో డబ్బు సంపాదించేందుకు నిందితుడు ప్రయత్నించినట్లు విచారణలో వెల్లడైనట్లు పేర్కొన్నారు.అరెస్టు చేసిన ముగ్గురు నిందితులను, స్వాధీనం చేసుకున్న సామగ్రిని తదుపరి విచారణ నిమిత్తం బాలాపూర్ పోలీస్‌స్టేషన్ అధికారులకు అప్పగించారు. పరారీలో ఉన్న మరో నిందితుడి కోసం పోలీసులు గాలింపు చర్యలు చేపట్టారు.ఈ దాడిలో షంషాబాద్‌ ప్రాంత ప్రత్యేక పోలీసు విభాగం ఇన్‌స్పెక్టర్‌ డి.కృష్ణమోహన్‌, బాలాపూర్‌ పోలీస్‌స్టేషన్‌ ఇన్‌స్పెక్టర్‌ సుధాకర్‌, ఉప ఇన్‌స్పెక్టర్‌ కె.మన్సూర్‌ అలీతో పాటు ప్రత్యేక పోలీసు బృందం, బాలాపూర్‌ పోలీసు సిబ్బంది పాల్గొన్నారు.