పయనించే సూర్యుడు న్యూస్ : చలికాలం వచ్చిందంటే చాలు, ఉదయాన్నే బయటకు వెళ్లాలంటేనే జనాలు వణికిపోతుంటారు. స్వెటర్లు, మఫ్లర్లు, టోపీలు వేసుకున్నా సరే చలి గాలుల నుంచి తప్పించుకోవడం కష్టంగానే ఉంటుంది. అయితే భారతీయులు ఏ సమస్యకైనా తమదైన శైలిలో పరిష్కారం వెతుకుతారన్న సంగతి తెలిసిందే. తాజాగా చలిని తట్టుకునేందుకు ఒక వ్యక్తి చేసిన ‘దేశీ జుగాడ్’ (Desi Jugaad) సోషల్ మీడియాలో విపరీతంగా వైరల్ అవుతోంది.సోషల్ మీడియాలో చక్కర్లు కొడుతున్న ఈ వీడియోలో ఒక వ్యక్తి బైక్ నడుపుతూ కనిపిస్తాడు. అయితే అతను మామూలు జాకెట్ ధరించలేదు. చలి గాలి తగలకుండా ఒక పెద్ద నీలం రంగు ప్లాస్టిక్ డ్రమ్మును తన శరీరానికి తగ్గట్టుగా కత్తిరించి, దాన్ని ఒక కవచంలా వేసుకున్నాడు. రోడ్డు కనిపించడానికి కళ్ల దగ్గర రెండు చిన్న రంధ్రాలు, చేతులు బయటకు తీయడానికి పక్కల నుంచి రంధ్రాలు చేసుకున్నాడు.అంతేకాదు, ఆ బైక్ వెనుక ఏకంగా ఒక మంచాన్ని కూడా అమర్చాడు. ఆ మంచం మీద మరో వ్యక్తి దుప్పటి కప్పుకుని హాయిగా నిద్రపోతూ ప్రయాణించడం ఈ వీడియోలో చూడొచ్చు. “చలిని తట్టుకునేందుకు దేశీ టెక్నాలజీ ఆవిష్కరణ.. మీరేమంటారు?” అనే క్యాప్షన్‌తో పోస్ట్ చేసిన ఈ వీడియోకు లక్షల్లో వ్యూస్ వస్తున్నాయి. దీనిపై నెటిజన్లు రకరకాలుగా స్పందిస్తున్నారు. కొందరు దీన్ని “ఇండియన్ ఇంజనీరింగ్ అద్భుతం” అని పొగడ్తలతో ముంచెత్తుతుండగా, మరికొందరు మాత్రం ఇది చాలా ప్రమాదకరమని హెచ్చరిస్తున్నారు. ఇలా డ్రమ్ములో ఇరుక్కుని బైక్ నడపడం వల్ల బ్యాలెన్స్ తప్పే అవకాశం ఉందని, ఇది క్షేమకరం కాదని కామెంట్స్ చేస్తున్నారు. ఏది ఏమైనా, చలి నుంచి తప్పించుకోవడానికి ఈ వ్యక్తి చేసిన ప్రయత్నం మాత్రం ఇప్పుడు ఇంటర్నెట్‌లో నవ్వులు పూయిస్తోంది.