పయనించే సూర్యుడు న్యూస్ :వివాదాస్పద వ్యాఖ్యలతో ఎప్పుడూ వార్తల్లో నిలిచే దర్శకుడు రామ్‌గోపాల్ వర్మ ఈసారి మెగా హీరో రామ్ చరణ్‌పై ప్రశంసల వర్షం కురిపించారు. ‘పెద్ది’ సినిమాలోని ‘చికిరి చికిరి’ సాంగ్‌ను ఉద్దేశిస్తూ, చాలా రోజుల తర్వాత చరణ్ తన అసలైన మాస్ ఎనర్జీతో కనిపించాడని వర్మ ‘ఎక్స్’లో పోస్ట్ చేశారు. సినిమా క్రాఫ్ట్‌ అన్నీ హీరోను ఎలివేట్ చేయడానికేనని, వందలాది డ్యాన్సర్లలో చరణ్ తక్కువయ్యేలా కాకుండా బుచ్చిబాబు చాలా సహజంగా చూపించారని ఆయన ప్రశంసించారు.వెండితెరపై ఆయన దర్శకత్వ శైలి ఎంత విలక్షణంగా ఉంటుందో, మాట్లాడే తీరు, ఆలోచనలు వ్యక్తపరిచే తీరు అంతకంటే విచిత్రంగా ఉంటాయి. శివ, అంతం, రక్తచరిత్ర, సత్య వంటి సినిమాలతో ఇండియన్ సినిమాకు కొత్త గ్రాఫ్ చూపించిన ఆర్జీవీ అప్పుడప్పుడూ సోషల్‌మీడియాలో చేసే ట్వీట్లు కాంట్రవర్శీ అవుతుంటాయి. అసలు వర్మ ఎప్పుడు ఎలా మాట్లాడతాడో కూడా కొన్నిసార్లు ఊహించడం కష్టంగా ఉంటుంది. అయితే ఆయన్ని ఎంతమంది తిడతారో అంతకంటే ఎక్కువ మంది అభిమానిస్తుంటారు కూడా.గతంలో ఆర్జీవీ, మెగా ఫ్యామిలీపై చేసిన వివాదాస్పద వ్యాఖ్యలు పెద్ద చర్చలకే దారి తీశాయి. పవన్ కళ్యాణ్, చిరంజీవిని వ్యంగ్యంగా టార్గెట్ చేస్తూ ఆయన కొన్ని వీడియోలు కూడా రిలీజ్ చేశారు. అయితే వర్మలో ఇటీవల స్పష్టమైన మార్పు కనిపిస్తోంది. ప్రస్తుతం ‘శివ’ రీ రిలీజ్ ప్రమోషన్లలో బిజీగా ఉన్న వర్మ.. ఇటీవల టోన్ మార్పుకున్నాడు. చిరంజీవి బహిరంగ క్షమాపణలు చెప్పి అందరినీ షాక్‌కి గురిచేశాడు. ‘మిమ్మల్ని బాధపెట్టినట్లయితే క్షమాపణలు కోరుకుంటున్నాను. మీ పెద్ద మనసుకు ధన్యవాదాలు’ అంటూ ఆర్జీవీ ట్వీట్ చేశాడు. ఆ పోస్ట్ చూసిన నెటిజన్లు అసలు వర్మకి ఏమైంది.. ఇలా మారిపోయాడు అంటూ కామెంట్లు చేశటా,ఆ షాక్‌ నుంచి మెగా ఫ్యాన్స్ ఇంకా తేరుకోకముందే ఆర్జీవీ మరో ట్విస్ట్ ఇచ్చాడు. రామ్‌చరణ్ , జాన్వీ కపూర్ జంటగా బుచ్చిబాబు కాంబినేషన్లో తెరకెక్కుతోన్న ‘పెద్ది’ చిత్రానికి ఇటీవల ‘చికిరి చికిరి’ అంటూ ఫస్ట్ సింగిల్ రిలీజ్ చేసిన సంగతి తెలిసిందే. ఈ నెల 11న విడుదలైన ఈ సాంగ్ యూట్యూబ్‌లో రికార్డులు క్రియేట్ చేస్తోంది. చరణ్ డ్యాన్స్, గ్రేస్‌ని ఆడియన్స్ ఫిదా అయిపోయారు. సోషల్‌మీడియాలో ఎక్కడ చూసినా ఈ సాంగ్‌కి డ్యాన్స్ చేస్తున్న వీడియోలే కనిపిస్తున్నాయి. తాజాగా ఆ సాంగ్‌పై స్పందించిన వర్మ.. రామ్‌చరణ్‌పై ప్రశంసలు కురిపించాడు.