పయనించే సూర్యుడు D.09.11.2026 నిజామాబాద్ జిల్లా స్టాపర్ టీ కే గంగాధర్.ఇందిరమ్మ ఇళ్ల నిర్మాణం, అమృత్ పథకం పనులు వేగవంతం చేయాలి.. ప్రజా సమస్యల పరిష్కారంలో నిర్లక్ష్యం వహిస్తే సహించేది లేదునిజామాబాద్ పట్టణంలోని జిల్లా కలెక్టర్ కార్యాలయంలో అడిషనల్ కలెక్టర్ రెవెన్యూ , అడిషనల్ కలెక్టర్ లోకల్ బాడీస్, డిఆర్ఓ, ఆర్డీవో, మున్సిపల్ కమిషనర్‌తో పాటు వివిధ శాఖల అధికారులతో తెలంగాణ ప్రభుత్వ సలహాదారు మహమ్మద్ అలీ షబ్బీర్ సమీక్షా సమావేశం నిర్వహించారు.ఈ సందర్భంగా పట్టణంలో కొనసాగుతున్న ఇందిరమ్మ ఇళ్ల నిర్మాణ పనులు, తాగునీటి సరఫరా, అమృత్ పథకం కింద నిర్మిస్తున్న వాటర్ ట్యాంకుల పనుల పురోగతితో పాటు పట్టణంలోని పలు ప్రజా సమస్యలపై అధికారులతో ఆయన సమగ్రంగా సమీక్షించారు.ఈ సందర్భంగా మహమ్మద్ అలీ షబ్బీర్ మాట్లాడుతూ...రాబోయే రోజుల్లో ఎల్‌నినో ప్రభావం కారణంగా ఎండల తీవ్రత పెరిగి, తాగునీటి సమస్యలు తలెత్తే అవకాశం ఉన్నందున అధికారులు ఇప్పటి నుంచే అప్రమత్తంగా ఉండాలని సూచించారు. ప్రజలకు తాగునీటి ఇబ్బందులు కలగకుండా సమగ్ర కార్యాచరణ రూపొందించాలని, అవసరమైన చోట ప్రత్యామ్నాయ నీటి సరఫరా ఏర్పాట్లు చేయాలని ఆదేశించారు. పట్టణంలోని అన్ని ప్రాంతాలకు సమానంగా, నిరంతరాయంగా తాగునీరు అందించేలా చర్యలు తీసుకోవాలన్నారు.అమృత్ పథకం కింద నిర్మిస్తున్న వాటర్ ట్యాంకుల పనులను వేగవంతం చేసి నిర్ణీత గడువులోగా పూర్తి చేయాలని, నిర్మాణ నాణ్యత విషయంలో ఎక్కడా రాజీ పడకూడదని స్పష్టం చేశారు. ఈ పనులు పూర్తయితే పట్టణ ప్రజలకు తాగునీటి సరఫరా మరింత మెరుగుపడుతుందని పేర్కొన్నారు.ఇందిరమ్మ ఇళ్ల పథకం పేద ప్రజల సొంతింటి కలను నెరవేర్చే గొప్ప సంక్షేమ కార్యక్రమమని, అర్హులైన లబ్ధిదారులకు ఎలాంటి ఇబ్బందులు లేకుండా పథకం అమలయ్యేలా అధికారులు ప్రత్యేక శ్రద్ధ చూపాలని అన్నారు. ఇళ్ల నిర్మాణ పురోగతిని ఎప్పటికప్పుడు పర్యవేక్షిస్తూ, లబ్ధిదారులకు ప్రభుత్వ పరంగా అందాల్సిన సహాయాన్ని సకాలంలో అందించాలని సూచించారు.నిజామాబాద్ పట్టణంలో రోడ్లు, డ్రైనేజీ, పారిశుద్ధ్యం, వీధి దీపాలు, తాగునీటి సరఫరా వంటి మౌలిక సదుపాయాలపై ప్రత్యేక దృష్టి సారించాలని అధికారులకు సూచించారు. ప్రజల నుంచి వచ్చే ఫిర్యాదులను పెండింగ్‌లో ఉంచకుండా తక్షణమే పరిష్కరించాలని తెలిపారు.ప్రజా సంక్షేమమే ప్రజా ప్రభుత్వ ప్రధాన లక్ష్యమని, ముఖ్యమంత్రి రేవంత్ రెడ్డి నాయకత్వంలోని కాంగ్రెస్ ప్రభుత్వం ప్రజలకు మెరుగైన మౌలిక సదుపాయాలు, సంక్షేమ పథకాలు అందించేందుకు కట్టుబడి ఉందని షబ్బీర్ అలీ పేర్కొన్నారు.అధికారులు ప్రజలకు అందుబాటులో ఉంటూ బాధ్యతాయుతంగా విధులు నిర్వహించాలని, అభివృద్ధి పనుల్లో జాప్యం జరగకుండా నిరంతరం పర్యవేక్షించాలని ఆదేశించారు. ప్రజలకు ఇబ్బందులు కలిగించే సమస్యల పరిష్కారంలో అధికారులు సమన్వయంతో పనిచేయాలని సూచించారు.ఈ సమీక్షా సమావేశంలో నుడా చైర్మన్ కేశ వేణు, పట్టణ కార్పొరేట ర్ లు సంబంధిత శాఖల అధికారులు పాల్గొన్నారు.