పయనించే సూర్యుడు న్యూస్ :చిత్తూరు జిల్లావాసులకు శుభవార్త. జనవరి నుంచి చిత్తూరు జిల్లాలో సంజీవని పథకం అమలు కానుంది. ఈ మేరకు సీఎం నారా చంద్రబాబు నాయుడు అధికారులను ఆదేశించారు. వైద్యారోగ్యశాఖపై సీఎం చంద్రబాబు శుక్రవారం సమీక్ష నిర్వహించారు. ఈ సందర్భంగా సంజీవని ప్రాజెక్టు గురించి వివరాలు అడిగి తెలుసుకున్నారు. జనవరి నుంచి చిత్తూరు జిల్లాలో సంజీవని ప్రాజెక్టు ప్రారంభించాలని అధికారులను ఆదేశించారు. అనంతరం రాష్ట్రవ్యాప్తంగా సంజీవని పథకం అమలు చేసే ఆలోచనలో ప్రభుత్వం ఉంది. సంజీవని పథకం కింద రాష్ట్రంలోని అందరికీ రూ.25 లక్షల వరకూ ఆరోగ్య బీమా అందించనున్నారు.సొంత జిల్లా ప్రజలకు ముఖ్యమంత్రి నారా చంద్రబాబు నాయుడు శుభవార్త వినిపించారు. కొత్త సంవత్సరం కానుకగా కొత్త పథకం ప్రారంభించాలని నిర్ణయించారు. ముఖ్యమంత్రి నారా చంద్రబాబు నాయుడు వైద్యారోగ్య శాఖపై శుక్రవారం రోజున సచివాలయంలో సమీక్షా సమావేశం నిర్వహించారు. ఈ సందర్భంగా సొంత నియోజకవర్గం కుప్పంలో పైలెట్ ప్రాజెక్టుగా చేపట్టిన సంజీవని ప్రాజెక్టు అమలు గురించి ఆరా తీశారు. అనంతరం జనవరి నుంచి చిత్తూరు జిల్లాలో సంజీవని ప్రాజెక్టును అమలు చేయాలని సీఎం చంద్రబాబు అధికారులను ఆదేశించారు. చిత్తూరు జిల్లాలో పరిశీలించిన అనంతరం.. రాష్ట్రవ్యాప్తంగా సంజీవని ప్రాజెక్టు అమలు చేయాలని ప్రభుత్వం భావిస్తోంది. మరోవైపు వైద్యారోగ్య శాఖపై సమీక్ష సందర్భంగా రాష్ట్రంలో మెడికల్ కాలేజీల నిర్మాణంపైనా చంద్రబాబు చర్చించారు. ఏపీ ప్రభుత్వం తొలి విడత కింద మదనపల్లి, మార్కాపురం, ఆదోని, పులివెందులలో పీపీపీ విధానంలో ప్రభుత్వం మెడికల్ కాలేజీల నిర్మాణం చేపడుతోంది. ఈ నేపథ్యంలో ఈ కాలేజీల నిర్మాణం గురించిన వివరాలను చంద్రబాబు అడిగి తెలుసుకున్నారు. నిర్దేశించిన సమయానికి వీటి నిర్మాణం పూర్తి చేసేలా చర్యలు తీసుకోవాలని అధికారులను చంద్రబాబు ఆదేశించారు. మరోవైపు రాష్ట్రంలోని ప్రజలందరికీ ఆరోగ్య బీమా సౌకర్యాన్ని కల్వించాలనే ఉద్దేశంతో ఏపీ ప్రభుత్వం ఈ సంజీవని ప్రాజెక్టు ఆలోచన చేసింది.
త్వరలోనే రాష్ట్రవ్యాప్తంగా దీనిని అమల్లోకి తేనుంది.సంజీవని ప్రాజెక్టు అనేది రాష్ట్రంలోని ప్రజలందరికీ ఆరోగ్య బీమాను అందించడానికి ఉద్దేశించిన పథకం. ఈ పథకం ద్పారా రాష్ట్రంలోని ప్రతి కుటుంబానికి రూ.25 లక్షల ఆరోగ్య బీమా సౌకర్యం కల్పిస్తారు. పేద, మధ్యతరగతి, ధనిక అనే దానితో సంబంధం లేకుండా.. ఆర్థిక స్థితిగతులతో అవసరం లేకుండా రాష్ట్రంలోని అందరికీ ఆరోగ్య బీమా కల్పించేలా ఈ యూనివర్సల్ హెల్త్ పాలసీ రూపొందించారు. సంజీవని పథకం కింద ప్రతి కుటుంబానికి ఏటా రూ.25 లక్షల వరకూ ఉచిత వైద్యం అందిస్తారు. ఎన్టీఆర్ వైద్య సేవా ట్రస్టు కింద ఉన్న ఆస్పత్రిలలో ఉచితంగా వైద్యం చేయించుకోవచ్చు. సుమారుగా 3,250 చికిత్సలు ఈ విధానంగా ద్వారా ఉచితంగా అందిస్తారు.ఇక సంజీవని పథకం కింద ప్రజలకు రూ.2.50 లక్షల వరకూ ఉచిత వైద్య సేవలు అందించేలా ప్రజల తరుఫున ప్రభుత్వం ఇన్సూరెన్స్ కంపెనీలకు ప్రీమియం చెల్లిస్తుంది. అయితే వైద్య చికిత్స ఖర్చు రెండున్నర లక్షలు దాటితే ఎన్టీఆర్ వైద్య సేవా ట్రస్టు కింద రూ.25 లక్షల వరకూ ఉచితంగా వైద్యం అందిస్తారు. ఈ విధంగా ప్రభుత్వం సంజీవని ప్రాజెక్టును రూపొందించింది. ఎక్కువ చికిత్సలకు అయ్యే ఖర్చు రెండున్నర లక్షల లోపే ఉండటంతో ఈ నిర్ణయం తీసుకున్నట్లు తెలుస్తోంది.