పయనించే సూర్యుడు న్యూస్ :తెలంగాణలోని ఎన్‌హెచ్-63 , ఎన్‌హెచ్-563 జాతీయ రహదారులలో వాహనాల వేగాన్ని పెంచేందుకు... నాలుగు ప్రాంతాలలో బైపాస్‌ల నిర్మాణం సహా విస్తరణ పనులకు మార్గం సుగమమైంది. మొత్తం 271 కిలోమీటర్ల నిడివి గల ఈ రహదారులను నాలుగు లేన్లకు విస్తరించడానికి కేంద్ర ఉపరితల రవాణాశాఖ రూ.10,034 కోట్ల నిధులను మంజూరు చేసింది. ఆర్మూర్-జగిత్యాల, జగిత్యాల-కరీంనగర్, జగిత్యాల-మంచిర్యాల సెక్షన్లలో ఈ విస్తరణ పనులు జరుగుతాయి. జగిత్యాల-వరంగల్ మధ్య ప్రయాణ సమయం గంటన్నర మేర తగ్గుతుందని అంచనా.తెలంగాణ రాష్ట్రంలోని రెండు అత్యంత ముఖ్యమైన జాతీయ రహదారులలో ట్రాఫిక్ రద్దీని తగ్గించి.. వాహనాల వేగాన్ని పెంచే దిశగా ఎదురైన అడ్డంకులు తొలగిపోయాయి. ఈ కీలకమైన రహదారులపై నాలుగు ప్రాంతాలలో బైపాస్ రోడ్ల నిర్మాణం చేపట్టడానికి మార్గం సుగమమైంది. మొత్తం 271 కిలోమీటర్ల పొడవునా జరిగే ఈ భారీ విస్తరణ పనులకు కేంద్ర ఉపరితల రవాణాశాఖ ఆర్థిక వ్యవహారాల కమిటీ ఏకంగా రూ.10,034 కోట్ల మొత్తాన్ని కేటాయిస్తూ ఆమోద ముద్ర వేసింది.ఎన్‌హెచ్-63 (నిజామాబాద్-జగదల్‌పూర్ రహదారి) , ఎన్‌హెచ్-563 (జగిత్యాల-కరీంనగర్-వరంగల్-ఖమ్మం రహదారి)లను భారత్‌మాల పరియోజన పథకంలో భాగంగా నాలుగు లేన్ల రహదారులుగా విస్తరించాలని నిర్ణయించారు. అయితే.. భూసేకరణ సమస్యలు, పర్యావరణ అనుమతులు, ఇతర సాంకేతిక కారణాల వల్ల పనులు ప్రారంభం కావడం ఆలస్యమవుతూ వచ్చింది. తాజాగా.. ఈ అడ్డంకులన్నింటినీ అధిగమించి, భారత జాతీయ రహదారుల సంస్థ (NHAI) ఈ విస్తరణ పనులకు టెండర్లను ఆహ్వానించడం ద్వారా నిర్మాణానికి గ్రీన్ సిగ్నల్ ఇచ్చింది. ఈ పనులు వచ్చే ఫిబ్రవరి నెలలో ప్రారంభమయ్యే అవకాశం ఉంది.ఈ విస్తరణ పనులు ప్రధానంగా మూడు సెక్షన్ల మధ్య జరగనున్నాయి: ఆర్మూర్-జగిత్యాల, జగిత్యాల-కరీంనగర్, జగిత్యాల-మంచిర్యాల. ఎన్‌హెచ్-63 విస్తరణ (ఆర్మూర్-మంచిర్యాల సెక్షన్)లో భాగంగా.. ఆర్మూర్-జగిత్యాల 64 కిలోమీటర్ల పొడవు గల ఈ సెక్షన్ నిర్మాణానికి రూ.2,338 కోట్లు వ్యయం చేయనున్నారు. తాజా ఆమోదంతో.. ఈ సెక్షన్ నిర్మాణం మూడు సంవత్సరాలలో పూర్తయ్యే అవకాశం ఉంది. జగిత్యాల-మంచిర్యాల సెక్ష విషయానికి వస్తే.. 68 కిలోమీటర్ల నిడివి గల ఈ ప్యాకేజీ పనులకు రూ.2,550 కోట్లు ఖర్చు చేయనున్నారు. ఈపీసీ (ఇంజినీరింగ్, ప్రొక్యూర్‌మెంట్, అండ్ కన్‌స్ట్రక్షన్) మోడల్‌లో టెండర్లను ఆమోదించారు. ఈ రోడ్డు విస్తరణ ద్వారా ఉత్తర తెలంగాణలోని ముఖ్యమైన కోల్ బెల్ట్ ప్రాంతానికి రవాణా సౌకర్యం గణనీయంగా మెరుగుపడుతుంది.ఎన్‌హెచ్-563 విస్తరణ (జగిత్యాల-వరంగల్ సెక్షన్)లో భాగంగా.. జగిత్యాల-కరీంనగర్ సెక్షన్ లో.. 59 కిలోమీటర్ల నిడివి గల ఈ రహదారిని 4 వరుసలుగా విస్తరించడానికి రూ.2,484 కోట్లు కేటాయించారు. రోడ్డు విస్తరణతో పాటు ట్రాఫిక్ చిక్కుల నివారణకు జంక్షన్ల విస్తరణ, రాత్రి ప్రయాణాల భద్రత కోసం సెంట్రల్ లైటింగ్ ఏర్పాటు కూడా చేయనున్నారు. ఈ పనులను హ్యామ్ (హైబ్రిడ్ ఆన్యుటీ మోడల్) పద్ధతిలో నిర్వహిస్తారు. ఈ రోడ్డు విస్తరణ పూర్తయితే జగిత్యాల , వరంగల్ నగరాల మధ్య ప్రయాణ సమయం దాదాపు గంటన్నర మేర తగ్గుతుందని అంచనా. అదనంగా.. కరీంనగర్-వరంగల్ మధ్య ఉన్న మరో 16 కిలోమీటర్ల రోడ్డును మెరుగుపరచడానికి రూ.500 కోట్లు ఖర్చు చేయనున్నారు.తెలంగాణలో జాతీయ రహదారుల విస్తరణ అనేది రవాణా సౌకర్యాన్ని మెరుగుపరచడం మాత్రమే కాదు... మెరుగైన రోడ్డు కనెక్టివిటీ ద్వారా ఈ ప్రాంతాలలో వ్యాపారం, పారిశ్రామికాభివృద్ధి, వ్యవసాయ ఉత్పత్తుల మార్కెటింగ్ ఊపందుకుంటాయి. ముఖ్యంగా.. నిజామాబాద్, జగిత్యాల, కరీంనగర్, వరంగల్, మంచిర్యాల వంటి ముఖ్య పట్టణాలకు మధ్య వేగవంతమైన ప్రయాణం సాధ్యమవుతుంది. బైపాస్‌ల నిర్మాణం పట్టణాల గుండా వెళ్లే ట్రాఫిక్ రద్దీని తగ్గించి.. స్థానిక ప్రజలకు ప్రశాంతమైన వాతావరణాన్ని అందిస్తుంది. మౌలిక సదుపాయాల కల్పనలో భాగంగా ఈ పనులు పూర్తయితే.. రాష్ట్రంలో సామాజిక-ఆర్థిక వృద్ధికి మరింత దోహదపడతాయని నిపుణులు అభిప్రాయపడుతున్నారు. రహదారుల నాణ్యత, భద్రత మెరుగుపడటం వలన ప్రమాదాల సంఖ్య కూడా గణనీయంగా తగ్గుతుందని భావిస్తున్నారు. ఈ ప్రాజెక్టు రాష్ట్ర పురోగతికి ఒక ముఖ్యమైన మైలురాయిగా నిలవనుంది.