పయనించే సూర్యుడు న్యూస్ అక్టోబర్ 9 తెలంగాణ స్టేట్ ఇంచార్జ్ శ్రీనివాస్ రెడ్డి కూకట్‌పల్లి ప్రభుత్వ డిగ్రీ కళాశాలలో బీఏ, బీఎస్సీ ప్రథమ సంవత్సరం విద్యార్థుల కోసం ఫ్రెషర్స్ డే కార్యక్రమాన్ని ఘనంగా నిర్వహించారు. కళాశాల ప్రిన్సిపాల్ డాక్టర్ ఎన్. చందన అధ్యక్షతన జరిగిన ఈ కార్యక్రమంలో సీనియర్ విద్యార్థులు నూతన విద్యార్థులకు ఆత్మీయ స్వాగతం పలికారు. కళాశాల ప్రాంగణం పండుగ వాతావరణాన్ని సంతరించుకుంది.ఈ సందర్భంగా ప్రిన్సిపాల్ డాక్టర్ ఎన్. చందన మాట్లాడుతూ, విద్యార్థులు విద్యాభ్యాసానికి ప్రాధాన్యం ఇస్తూనే సాంస్కృతిక, సృజనాత్మక, క్రీడా కార్యక్రమాల్లోనూ చురుకుగా పాల్గొనాలని సూచించారు. క్రమశిక్షణ, కృషి, సమయపాలన, సానుకూల దృక్పథం విద్యార్థుల విజయానికి కీలకమని పేర్కొన్నారు. ఉన్నత లక్ష్యాలను నిర్దేశించుకుని వాటి సాధనకు నిరంతరం శ్రమించాలని తెలిపారు.వైస్ ప్రిన్సిపాల్ ప్రొఫెసర్ డి. కరుణాకర్, డాక్టర్ లక్ష్మయ్య, వివిధ విభాగాల అధిపతులు విద్యార్థులను ఉద్దేశించి ప్రసంగించారు. కళాశాల వాతావరణానికి కొత్తగా అడుగుపెట్టిన విద్యార్థులు ఎలాంటి సందేహాలు ఉన్నా అధ్యాపకులను సంప్రదించాలని సూచించారు. సీనియర్ విద్యార్థులు నూతన విద్యార్థులకు మార్గదర్శకులుగా నిలిచి, వారికి అవసరమైన సహకారం అందించాలని కోరారు. పరస్పర గౌరవం, సహకారం, స్నేహభావంతో ముందుకు సాగితే కళాశాల జీవితం మరింత ఆనందదాయకంగా ఉంటుందని పేర్కొన్నారు.కార్యక్రమంలో విద్యార్థులు ప్రదర్శించిన నృత్యాలు, పాటలు, కవితా పఠనం, వినోద కార్యక్రమాలు విశేషంగా ఆకట్టుకున్నాయి. నూతన విద్యార్థులు ఉత్సాహంగా పాల్గొని తమ ప్రతిభను ప్రదర్శించారు. కార్యక్రమం చివర్లో విద్యార్థులు పరస్పరం పరిచయాలు చేసుకుని ఆనందాన్ని పంచుకున్నారు.ఈ కార్యక్రమంలో అధ్యాపకులు, అధ్యాపకేతర సిబ్బంది, సీనియర్ విద్యార్థులు, ప్రథమ సంవత్సరం విద్యార్థులు పాల్గొన్నారు.