జనం న్యూస్ |: బీహార్లోని నలందాలో ఇద్దరు పోలీసు కానిస్టేబుళ్లు నడిరోడ్డుపై ఒకరితో ఒకరు ఘర్షణకు దిగిన ఘటనకు సంబంధించిన వీడియో సోషల్ మీడియాలో వైరల్గా మారింది. పగటిపూట ప్రజల మధ్యే ఇద్దరు పోలీసులు వాగ్వాదానికి దిగి, అనంతరం పరస్పరం దాడి చేసుకున్న దృశ్యాలు వీడియోలో కనిపిస్తున్నాయి. వీడియోలో మొదట ఓ పోలీసు మరో పోలీసు బహిరంగంగా లంచం తీసుకున్నాడని ఆరోపిస్తూ మాట్లాడటం కనిపించింది. అనంతరం అతను అక్కడి నుంచి వెళ్లేందుకు ప్రయత్నించగా, మరో పోలీసు తన వద్ద ఉన్న లాఠీతో అతడిపై దాడి చేసినట్లు వీడియోలో కనిపిస్తోంది. దీంతో ఇద్దరి మధ్య ఘర్షణ తీవ్రరూపం దాల్చి, ఒకరిపై ఒకరు పిడిగుద్దులు కురిపించుకున్నారు. ఒక దశలో పరస్పరం మెడలు పట్టుకుని కూడా కొట్టుకున్నారు. పోలీసులు కొట్టుకుంటుండటంతో అక్కడున్న కొందరు స్థానికులు వారిని హెచ్చరించినట్లు తెలుస్తోంది. ఇలా చేస్తే సస్పెండ్ అయ్యే అవకాశం ఉందని చెప్పినా వారు పట్టించుకోకుండా గొడవ కొనసాగించారు. చివరకు స్థానికులు జోక్యం చేసుకుని ఇద్దరినీ విడదీసేందుకు ప్రయత్నించారు. ఈ ఘటనను అక్కడున్న పలువురు తమ మొబైల్ ఫోన్లలో చిత్రీకరించి సోషల్ మీడియాలో పోస్ట్ చేయడంతో వీడియో విస్తృతంగా వైరల్గా మారింది. ఘటనపై స్పందించిన నలందా పోలీసులు ఇద్దరు పోలీసులను పోలీస్ సెంటర్కు పంపించి, పూర్తి స్థాయి దర్యాప్తునకు ఆదేశించినట్లు తెలిపారు. దర్యాప్తు అనంతరం క్రమశిక్షణా చర్యలు తీసుకుంటామని పోలీసు శాఖ వెల్లడించింది. ఈ ఘటనపై సోషల్ మీడియాలో పలువురు ఆందోళన వ్యక్తం చేస్తూ, పోలీసుల ప్రవర్తనపై ప్రశ్నలు లేవనెత్తుతున్నారు.